Kraka arnaavoq silassorisoq eqqarsariataallaqissoq! Taamma allaaserineqarsimavoq nunani avannarlerni kristumiuunngitsut upperisarsiornerannik ilisimaniutilinnit. Kunngip paniatut inunngorsimavoq, ilaqutariinnili piitsuni qitornarsiaasimalluni. Vikinngit kunngiisa tusaamasaanersaanut Regnar Lodborgimut naggataagut katippoq. Kinguuariinni oqaluttuarsiat malillugit Krakap Regnar Lodborg naapitsinnagu eqqorniagassat assigiinngitsut akiniarallartariaqarsimavai. Regnar Lodborg naapitussaasimavaa "atisaqarani kisiannili mattaanganani" "qaarsilanani iissinnginniarsimananilu" "kisimiinnani inummillu ingerlaqateqarani" Krakap eqqorniaqqusat ima akisimavai: Qassutinik nimerluni, uanitsunik nerisassaanngitsumik kimmiarluni, qimmimillu maliteqarluni. Oqaluttuap ersersippaa Kraka sutigut tamatigut eqqarsariataallaqqissuusoq, nukittuujulluni arnaasoq iluaqutissaq. Taamaatumik ateq "KRAKA" peqatigiilluni sulinissamut suleqatigiittussanut atsiullugu toqqarneqarpoq. Tassa qallunaanut, Slesvigimiunut Kalaallillu arnat peqatigiiffiinnut.